Etsapuwera

Ah, sadyang kay ilap mo pa noon
Humihikbi kapag natitingnan
Tigas ng ngalngal ‘pag akmang lalapitan
Napagkit sa pundya ng Aleng may taban

Pagkabunso mo’y agad naagaw
Kinailangan kang ipamigay
Gatas ng inang halos di nalasahan
Oyayi’t pagkilik kasabay naparam

Pinagpala ng maraming kamay
Unang hakbang, iba ang nag-akay
Pasa-pasa napunan iyong kahubdan
Unti-unting napaghilom mga latay

Espasyong hiram, lumang laruan
Ang sa iyo’y pagkakakilanlan
Maaaring wala ngang nagmamay-ari
Marami naman ang nais kumandili